Институттун директору Данияр Каскеев имарат 1984-жылы курулганын жана ошол убактан бери капиталдык оңдоп-түзөө жүргүзүлгөн жок экенин билдирди. Анткен менен, институт жыл сайын өлкөнүн ар кайсы бурчтарынан 13 миңден ашык бейтапты кабыл алууну улантууда.
Депутат Гулнара Баатырова институттун коомчулук үчүн маанилүүлүгүн белгилеп, бейтаптар үчүн ыңгайлуу жана жеткиликтүү шарттарды түзүүнүн зарылдыгын баса белгиледи. Ал ошондой эле баатыр энелер үчүн акысыз дарылоо маселесине жана медициналык жардам көрсөтүү мекемесин камсыз кылуу зарылдыгына көңүл бурду.
Депутат Гулкан Молдобекова учурда тамактанууга бөлүнгөн финансылык каражаттар жетишсиз экенин айтып, аны көбөйтүүгө чакырды. Ал ошондой эле медициналык кызматкерлер үчүн турак жай жетишсиздиги маселесин козгоду.
Депутат Токтобубу Ашымбаева институт өлкөдө бальнеология жана реабилитация тармагында алдыңкы орунда турганын белгилеп, бейтаптар үчүн ыңгайлуу шарттарды түзүүнүн маанилүүлүгүн айтты. Ал мүмкүнчүлүгү чектелген адамдар жана балдар үчүн дарылоонун сапатын жогорулатуу зарылдыгына өзгөчө көңүл бурду.
Комитеттин мүчөлөрү Кыргыз илимий-изилдөө курортология жана реабилитация институтунда медициналык жабдууларды модернизациялоо, капиталдык оңдоп-түзөө жүргүзүү, медициналык кызмат көрсөтүүлөрдүн сапатын жакшыртуу жана кызматкерлердин айлык акысынын жогорулашын камсыз кылуу боюнча чараларды көрүүнү сунушташты.
