Бул маалыматты Ош облусундагы президенттин өкүлчүлүгүнүн басма сөз кызматы берди.
Ачылыш аземине ыйгарым укуктуу өкүл Аманкан Кенжебаев, саламаттык сактоо министринин биринчи орун басары Айбек Маткеримов, Ош шаарынын жетекчилери, медициналык кызматкерлер жана ар кандай мекемелердин өкүлдөрү катышты.
А. Кенжебаев белгилегендей, материалдык-техникалык базаны жакшыртуудан тышкары, медициналык кызматкерлер үчүн ыңгайлуу шарттарды түзүү, алардын квалификациясын жогорулатуу жана айлык акыны 100% га чейин жогорулатуу боюнча иштер жүргүзүлүүдө.
Капитальный ремонт учурунда «Эне жана бала», операциялык блок, чоңдор жана балдар үчүн реанимациялык бөлүмдөр, боюнан түшүү патологиясы бөлүмү, ошондой эле борборлоштурулган стерилизация, клиникалык-диагностикалык лаборатория жана амбулатордук-диагностикалык бөлүм толугу менен жаңыланды. 3 млн 855,7 миң сомдук борборлоштурулган кислород станциясы пайдаланууга берилди.
Жаңы төрөт стационарынын каржылануы мамлекеттик бюджеттен жүргүзүлдү, ал эми эки кабаттуу имаратты куруу боюнча тендердин жалпы наркы 87 млн 900 миң сомду түздү. Медициналык мекеме заманбап жабдуулар менен жабдылган жана калкка сапаттуу медициналык жардам көрсөтүү үчүн бардык зарыл болгон шарттар түзүлгөн.
Кенжебаев ошондой эле жаңыланган стационардын инфраструктурасы жана техникалык жабдуулары менен таанышып чыкты.
Эскерте кетсек, Ош облусунун төрөт үйү 1968-жылдын 11-апрелинде ачылган, баштапкы планда 250 орунга эсептелген. Бул жерде капитальный ремонт биринчи жолу жүргүзүлүп жатат.
