Бишкекте бүгүн саламаттык сактоо министри Каныбек Досмамбетовдун БУУнун Кыргызстандагы туруктуу координатору Антье Граве менен жолугушуусу өттү. Бул жолугушууда министр саламаттык сактоо реформаларына БУУ системасы тарабынан көрсөтүлгөн колдоо үчүн ыраазычылык билдирди. Ал ар кандай БУУ агенттиктеринин медициналык-санитардык коопсуздук жана коомдук саламаттыкты камсыздоо боюнча Улуттук аракеттер планын түзүү жана ишке ашыруудагы салымын белгиледи.
Каныбек Досмамбеков жаңы саламаттык сактоо министрлигинин командасынын негизги милдеттеринин бири - оорулардын алдын алууга, алардын дарыланышына гана эмес, саламат коомду түзүүгө өтүү экенин баса белгиледи.
Министр оорулардын алдын алуу, дене тарбиясын жана ден соолукка пайдалуу жашоо стилин пропагандалоо, иммунизацияны жакшыртуу, энелердин жана балдардын ден соолугун коргоо, энелердин өлүмүн азайтуу, эпидемиологиялык көзөмөлдү күчөтүү жана саламаттык сактоо системасын реформалоо сыяктуу негизги иш багыттарын белгиледи.
Министр ошондой эле саламаттык сактоодо санариптештирүүнүн маанилүүлүгүн, электрондук медициналык карталарды киргизүү, телемедициналык технологияларды колдонуу жана тез арада жооп берүү үчүн кырдаалдык борборлорду түзүү боюнча баса белгиледи.
Каныбек Досмамбеков медициналык мекемелерди заманбап жабдуулар менен камсыздоо, чет өлкөлөрдө медициналык кызматкерлер үчүн стажировка программаларын кеңейтүү жана эл аралык тажрыйба алмашуу боюнча БУУнун колдоосуна кызыгуусун билдирди.
Антье Граве БУУ системасынын Кыргыз Республикасынын Саламаттык сактоо министрлиги менен кызматташтыкты улантууга жана тереңдетүүгө даяр экенин дагы бир жолу белгиледи. Ал Кыргызстан БУУ тарабынан колдоого алынган глобалдык санарип трансформация программасына катышып жатканын жана санариптештирүү, иммунизация жана ден соолукты коргоо боюнча жардам берүүгө даяр экенин айтты.
Мындан тышкары, тараптар 2026-2027-жылдарга стратегикалык пландоону жана 2028-2032-жылдарга кызматташтык боюнча жаңы беш жылдык рамка документин даярдоону талкуулашты, Саламаттык сактоо министрлигинин биргелешкен иштин приоритеттерин белгилөөгө активдүү катышуусунун маанилүүлүгүн баса белгилешти.
Жолугушуунун жыйынтыгында эки тарап өнөктөштүктү бекемдөөгө жана Кыргызстандагы саламаттык сактоо системасын туруктуу өнүктүрүү үчүн биргелешкен ишти улантууга кызыгуусун билдиришти.
