Переговорлор учурунда парламенттик дипломатияны өнүктүрүүгө, маданий-гуманитардык жана саясий-экономикалык өз ара аракеттешүүнү кеңейтүүгө, ошондой эле адистештирилген комитеттердин деңгээлинде байланыштарды чыңдоого көңүл бурулду.
Марлен Маматалиев акыркы жылдары Кыргызстан менен Корея Республикасы ортосундагы өз ара аракеттешүүнүн динамикасы байкалаарлык түрдө өскөнүн белгиледи. Ал Жогорку Кеңеш бул мамилелерди артыкчылыктуу деп эсептээрин жана кореялык тарап менен 22 депутаттан турган достук тобун түзгөнүн айтты.
Мындан тышкары, эл аралык форумдарда кызматташуу маселелери, анын ичинде "Ортолук Азия + Корея" форматы боюнча талкууланды.
Торага соода-экономикалык мамилелерди жакшыртуунун зарылдыгына көңүл бурду жана Кыргызстан экология, айлана-чөйрөнү коргоо жана климаттын өзгөрүшү маселелерин чечүү боюнча кызматташууга кызыкдар экенин билдирди. Бул контекстте ал кореялык делегацияны II Глобалдык тоо саммитине "Бишкек+25" катышууга чакырды.
Ким Сок Ги, өз кезегинде, анын Ортолук Азияга болгон сапары Кыргызстанга багытталганын белгиледи. Ал профилдик комитеттер арасында парламенттер аралык өз ара аракеттешүүнү тереңдетүүнүн маанилүүлүгүн айтты.
Анын айтымында, 1992-жылы дипломатиялык мамилелер орногондон бери эки мамлекет арасында бекем кызматташтык курулган, бул мурда жетишилген макулдашууларды натыйжалуу ишке ашыруу үчүн өнүктүрүлүшү керек.
Мындан тышкары, ал түз авиарейстердин ачылышы жарандар ортосундагы байланыштарды активдештирүүгө жана туристтердин Кыргызстанга болгон кызыгуусун арттырууга көмөктөшөрүн кошумчалады.
