Депутат Дастан Бекешев аталган мыйзам долбоорунун демилгечиси болуп чыкты.
Документ мамлекеттик сатып алууларды жүргүзүүдө мүмкүнчүлүгү чектелген адамдардын кызыкчылыктарын эске алууну талап кылат. Бекешев өкмөт мыйзам долбооруна терс баа бергенин, анткени курулуш тармагында мүмкүнчүлүгү чектелген адамдардын укуктарын коргойт деген нормалардын бар экенин белгиледи.
«Ошентсе да, маселе курулуш менен гана чектелбейт. Ал кызмат көрсөтүү жана сатып алуулар тармагына да тиешелүү. Мисалы, өткөн жылы автобустар сатып алганда пандустарды эске албагандыктан, жаңы автобустарга кошумча каражат жумшалууга туура келди. Мектептерди долбоорлоодо да пандустарды унутуп коё беришет. Бул мыйзам долбоорун кабыл алуу мамлекеттик сатып алууларда ушул аспектилерди эске алууга мүмкүндүк берет», — деди депутат.
Дастан Бекешев ошондой эле экинчи окууда мыйзам долбоорунун жоболорун өкмөт менен макулдашууну пландап жатканын билдирди.
