Бул документ Конституциялык мыйзам чыгаруу жана мамлекеттик түзүлүш боюнча комитеттен да жактырылганын белгилеп өтүү керек.
Бүгүнкү күндө Кыргызстанда 300дөн 500гө чейин стартап катталган, алардын көбү социалдык маселелерди чечүүгө багытталган. 2024-жылы өлкөдөгү венчурдук инвестициялар 1,5 миллиард сомду түздү, жаңы мыйзам бул сектор үчүн укуктук шарттарды түзүүгө арналган.
Мыйзам долбоорунда негизги катышуучулардын ролдору: бизнес-ангелдер, венчурдук инвесторлор жана башкаруучулар так сүрөттөлгөн. Конверттелүүчү насыялар жана опциондук келишимдер сыяктуу эл аралык финансылык инструменттер киргизилет. Ошондой эле, тышкы аудит бар болсо, юридикалык жак түзбөстөн же командиттик өнөктөштүктөр катары иштей турган венчурдук фонддордун иштөө тартиби жазылат.
Талкуу учурунда комитеттин мүчөлөрү венчурдук инвестициялар өзүнүн табияты боюнча жогорку тобокелдиктер менен байланыштуу экенин белгилешти. Алар бардык катышуучулардын кызыкчылыктарын коргоо жана отчеттуулуктун ачыктыгын камсыздоо үчүн бул тобокелдиктерди минималдаштыруунун механизмдерин иштеп чыгуу жана киргизүү зарылдыгын баса белгилешти.
Депутат Дастан Бекешев мамлекеттик венчурдук инвестициялоого түздөн-түз катышуу боюнча кооптонууларын билдирди, бул ыкманы мамлекеттик каражаттар үчүн негизсиз тобокелдик деп атады.
Бул боюнча Улуттук инвестициялар агенттигинин орун басары Жалын Жээналиев, мыйзам долбоорунун экинчи окуусуна чейин агенттик "фонд фонддор" структурасын өзгөртүү боюнча сунуштарды талкуулоого даяр экенин билдирди. Бул мамлекет стартаптарды түздөн-түз каржылабай, профессионалдык венчурдук фонддорго инвестиция салат дегенди билдирет.
