Аталган суммадан болгону 73 миллион 986 миң сомду кайтарып алууга мүмкүн болду. Абдиев көптөгөн алаяктарга кабылган жарандар акчаларынын жоголгону тууралуу 1-2 күндөн кийин билишерин, ал эми кылмышкерлер акчаларын өз эсептерине бир нече сааттын ичинде өткөрүп алышарын белгиледи.
Депутат Эльвира Сурабалдиева уурдалган акчалардын кайтарылышынын төмөн пайыздык көрсөткүчүнө тынчсыздануусун билдирди. Ал көптөгөн жабырлануучулар милицияга кайрылбай турганын, анткени өз акчаларын кайтарып алууга мүмкүнчүлүк бар экенине ишенбестигин айтты. Ошондой эле, анын сөзүнө караганда, укук коргоо органдарынын кызматкерлери кээде акчаларды кайтарып алууга мүмкүнчүлүк жок экенин билдиришет.
Сурабалдиева ошондой эле электрондук капчыктан уурдалган акчаларды байкаган жарандар кандай аракеттерди жасашы керектигин сурады.
Нурбек Абдиев биринчи кезекте картасы байланган банкка жана ИИМге кайрылуу керектигин айтты. Ал уурдалган убакыттан бери 24 сааттан аз убакыт өтсө, акчаларды кайтарып алуу мүмкүнчүлүгү кыйла жогору экенин кошумчалады. Учурда министрлик Улуттук банк менен биргеликте шектүү финансылык операцияларды бөгөттөөчү антифрод системасын киргизүү боюнча иш алып барууда. Мындан тышкары, ал криптовалюта менен байланышкан алаяктардын көбөйүп жатканын айтып, мындай учурларда уурдалган активдер менен операцияларды токтотуу үчүн криптобиржаларга суроолорду жиберишерин белгиледи.
