Бул мыйзам долбоорунун сунушуна ылайык, мамлекеттик органдар жарандардын кайрылууларына жооп берүү үчүн талап кылынган мөөнөттү 14 жумушчу күндөн 10 жумушчу күнгө чейин кыскартуу пландалууда.
Кожокулова жыл сайын мамлекеттик мекемелерге келип түшкөн жарандардын арыздарынын санынын өсүп жатканын белгиледи.
«Мурда кайрылууну кароо мөөнөтү бир айды түзсө, андан кийин 14 күнгө кыскартылган, азыр болсо 10 күнгө чейин кыскартуу пландалууда. Цифрлаштыруу тууралуу көп сүйлөсө да, мамлекеттик органдарга жооп даярдоо же кошумча текшерүүлөрдү өткөрүү үчүн кээде убакыт керек. Эгер мыйзам кабыл алынса, мамлекеттик органдар жооп берүүдө шашылыштыкка барышы мүмкүн жана тиешелүү текшерүүлөрдү жүргүзбөй, формалдуу жоопторду беришет», — деп белгиледи депутат.
Ошондой эле Гуля Кожокулова бул мыйзам долбоору боюнча Башкы прокуратуранын пикирине кызыкты. Башкы прокурордун орун басары Залкарбек Акназаров бул документ боюнча терс корутунду даярдалганын тастыктады.
