Бул өзгөртүүлөрдүн негизги максаты өлкөдө инклюзивдүү спортту өнүктүрүү үчүн жагымдуу шарттарды түзүү болуп саналат.
Урмат Асанбаев сунушталган өзгөртүүлөрдө сурдлимпиялык спортту колдоого басым жасалганын белгиледи. Бул өзгөртүүлөр эл аралык мелдештерде чоң жетишкендиктерге жеткен угуу мүмкүнчүлүгү чектелген спортчуларга жардам берүүгө багытталган.
Мыйзам долбоору сурдлимпиялык спорт менен байланышкан негизги түшүнүктөрдү аныктайт жана спортчулар менен алардын машыктыруучуларына Сурдлимпиялык оюндардагы жетишкендиктери үчүн бир жолку акчалай сыйлыктарды берүү системасын сунуштайт.
Агенттиктин жетекчиси белгилегендей, Кыргызстан командасы 2019-жылдан бери Сурдлимпиялык оюндарга катышып келет. 2022-жылы биздин команда Бразилиядагы мелдеште алтын медаль утуп алды. 2024-жылдагы Азия-Тынч океан оюндарында кыргызстандык спортчулар 18 медаль утуп, командалык эсепте алтынчы орунду ээлешти.
