ЮНИСЕФ уюму Кыргызстандын президенти Садыр Жапаровдун үч жашка чейинки бардык балдар үчүн "Бала ырысы" деген бирдиктүү айлык финансылык жардамды киргизүү боюнча жарлыгын колдоду. Бул кадам уюмдун расмий билдирүүсүндө жарыяланды.
ЮНИСЕФ бул кадам Кыргыз Республикасынын балдардын укуктарын коргоого болгон туруктуу берилгендигин көрсөтүп, эрте балдар билим берүүнү өнүктүрүүгө маанилүү салым болуп эсептелинерин белгиледи.
ЮНИСЕФтин маалыматы боюнча, жаш балдар үчүн социалдык коргоону кеңейтүү балдардын кедейчилигине каршы күрөшүүнүн эң натыйжалуу чараларынын бири болуп саналат жана ар бир балага жашоодо мыкты шарттарды камсыз кылууга жардам берет.
Мындан тышкары, уюм Кыргызстандын 2030-жылга чейинки Улуттук өнүктүрүү программасынын алкагында балдардын кедейчилигин 33,1% дан 25% га чейин төмөндөтүү, баштапкы медициналык-санитардык жардамга жеткиликтүүлүктү жакшыртуу жана мектепке чейинки билим берүүнү өнүктүрүү пландалганын эске салды.
“Бала ырысы” жөлөк пулунун киргизилиши бул максаттарды ишке ашырууда жана өлкөдөгү балдардын укуктарын коргоо системасын күчөтүүдө маанилүү этап болот.
ЮНИСЕФ ошондой эле эл аралык тажрыйба эрте балалыкка инвестицияланган ар бир доллар билим берүү натыйжаларын жогорулатуу, ден соолукты жакшыртуу жана социалдык теңсиздикти азайтуу түрүндө 13 долларга чейин киреше алып келерин көрсөтүп жатканын белгиледи.
Уюм Кыргызстандын өкмөтүнө балдарды жана алардын үй-бүлөлөрүн колдоо маселелерине көңүл бурганы үчүн ыраазычылык билдирип, "Бала ырысы" программасын ишке ашыруу жана балдар үчүн социалдык коргоо системасын өнүктүрүү боюнча улуттук өнөктөштөр менен кызматташууга даяр экенин билдирди.
