Кыргызстан Европалык Союздун соода жана стратегиялык өнөктөштүк боюнча көрсөтмөлөрүнө баш ийүүнү пландаштырбайт. Бул тууралуу Жогорку Кеңештин төрагасы Марлен Маматалиев «Вести» маалымат кызматына берген интервьюсунда билдирди.
Ал санкциялардын мүмкүн болгон тобокелдиктерине карабастан, Россия менен стратегиялык кызматташтыктын маанилүүлүгүн белгиледи.
«Биринчи кезекте, биз көз карандысыз мамлекетпиз. Биз башкалардан көз каранды эмеспиз. Эч кандай коркунучтар же басым чаралары бизди токтото албайт. Биздин республикабыздын келечеги жана улуттук кызыкчылыктарыбыз бар, аларды биз коргойбуз. Биздин өнүгүү үчүн так стратегиябыз бар жана белгиленген жол менен жүрөбүз», — деди ал.
Маматалиевдин айтымында, Кыргызстан эл аралык коомчулуктун мүчөсү катары жоопкерчилик көрсөтүүдө.
«Биз эл аралык мыйзамдарды сактайбыз жана БУУнун Уставына ылайык иш кылабыз. Биз эл аралык нормаларды карманабыз. Ошондуктан, бизге карата коюлган айыптоолор мени үчүн орунсуз көрүнөт», — деп кошумчалады Жогорку Кеңештин спикери.
Ошол эле учурда ал, Россия менен парламенттик дипломатиянын президент Садыр Жапаров тарабынан белгиленген тышкы саясат курсу чегинде күндөн-күнгө маанилүү болуп жатканын белгиледи.
