Экономика жана соода министрлигинин алдындагы Финансылык рынокту жөнгө салуу жана көзөмөлдөө мамлекеттик кызматынын төрагасы Марат Пирназаров мыйзам долбоору тууралуу маалымат берди. Ал бул демилгени ишке ашыруунун негизги максаты турак жайды мажбурлап камсыздандыруу системасын жакшыртуу экенин белгиледи, бул камсыздандыруу секторунун финансылык туруктуулугун жогорулатууга жана жарандардын кызыкчылыктарын коргоого мүмкүндүк берет.
Мыйзам долбоору камсыздандыруу учурлары боюнча убагында жана кепилденген төлөмдөрдү камсыз кылууну да карайт. Талкуу учурунда депутат Алтынбек Кылычбаев камсыздандыруу компенсацияларынын, айрыкча өрт учурларында, төлөнүү мөөнөттөрү жана төлөмдөрдүн көлөмү боюнча суроолорду берди. Марат Пирназаров максималдуу төлөмдүн көлөмү шаардык тургундар үчүн 1 миллион сом, айылдык тургундар үчүн 500 миң сом экенин, ал эми төлөмдөрдү жүргүзүү мөөнөтү бир айга чейин экенин билдирди.
Депутат Гульнара Акимбаева мажбурлап камсыздандыруу процессинде үчүнчү тарап катары кимдердин катыша аларын тактап, мыйзам долбоорунун бир нече беренелери боюнча суроолорду берди.
Депутат Токтобубу Ашымбаева мурдагы камсыздандыруу төлөмдөрү тууралуу суроо узатканда, докладчы статистиканы билдирди: 2024-жылы 240 камсыздандыруу учуру катталып, төлөмдөрдүн жалпы суммасы 37 миллион сомду түзгөн, 2025-жылы 247 учур катталып, жалпы төлөмдөр 32 миллион сомду түзгөн, ал эми ушул жылы 10 миллион сомго 37 учур катталды.
