Анын айтымында, жакында беш жаран умрага жөнөп кете албай калды, анткени аэропортто финансылык карыздардын бар экени аныкталган.
«Алар «Тундук» системасындагы карыздарын текшеришкен жана эч кандай карыз тапкан эмес. Бирок, бул маалымат алардын учуп кетер алдында өзгөрдү. Бул «Тундук» жана Чек ара кызматынын системаларынын ортосундагы шайкешсиздиктен болуп жатат. Мындай кырдаалдардын алдын алуу үчүн алардын өз ара аракеттешүүсүн тез арада жөнгө салуу зарыл. Эгер адам аэропортто карызын төлөөгө даяр болсо, анда бул тууралуу маалымат система боюнча дароо жаңыртылышы керек, ошондо ал учуп кете алат», — деп баса белгиледи Талиева.
Башкы прокурордун орун басары Умуткан Конкубаева Чек ара кызматы СВМ-программасын колдонорун жана учурда башка системалар менен синхронизациялоо боюнча иштер улантылып жатканын кошумчалады. «Эгер карыз аэропортто төлөнсө, төлөм тууралуу маалымат система боюнча үч сааттан кийин гана пайда болот», — деп тактады ал.
