Туманбаевдин айтымында, транспорт каражаттарын жана айдоочуларды каттоо мамлекеттик борборуна («Унаа») баруунун зарылдыгы жок, техпаспорту жана мамлекеттик номерлерди алуу учурларын эске албаганда. Келечекте документтерди үйгө жеткирүү системасын киргизүү пландалууда, бул толугу менен борборго жеке барууну жокко чыгарат.
«Учурда унааларды кайра каттоо электрондук форматта жеткиликтүү. Биз жарандардын убактысын үнөмдөп, кызмат көрсөтүүнүн ыңгайлуу жана ачык болушун камсыздоого аракет кылып жатабыз», — деди Каныбек Туманбаев.
Ал мамлекеттик кызматтардын санариптик трансформациясы ылдам темпте жүрүп жатканын, ал эми «Кызмат» өлкө боюнча электрондук кызматтардын спектрин кеңейтип, кезектерди кыскартып, документтерди алыстан алууга мүмкүнчүлүк берерин белгиледи. Туманбаев мындай чаралар мамлекеттик сектордун ишинин ачыктыгын кыйла жогорулатып, жарандардын жашоосун жеңилдетерин баса белгиледи.
«Кызматта» онлайн кайра каттоо пилоттук режимде экенин жана милдеттүү электрондук форматка өтүү реформанын алкагында маанилүү кадам болоорун эскертишти.
