Визит учурунда делегация «Учкун» компаниясынын өндүрүш цехтерин зыярат кылып, аларга акциздик маркалар, мамлекеттик маанидеги документтер жана номерлүү белгилерди даярдоо процессин көрсөтүштү. Ошондой эле, алар маркалоо жана отундун сапатын контролдоо үчүн жабдууларды көрүштү.
Бүгүнкү күндө бул ишкананын базасында мамлекеттик каттоодон өткөн номерлүү белгилер, ID-карталар, айдоочулук күбөлүктөр, окуу китептери жана дипломдор сыяктуу толук продукция спектри өндүрүлүүдө. Тажикстандык өкүлдөр паспортторду жана башка расмий документтерди өндүрүү линиясына кызыгуу көрсөтүштү.
Кийин делегация «Кызмат» мекемесинде болуп, жетекчилик өз кызматтары жана санариптик долбоорлору тууралуу айтып берди.
2025-жылы «Кызмат» 3,9 миллионго жакын мамлекеттик кызмат көрсөттү, анын 539 миңден ашыгы онлайн форматта берилди.
Жаңы кызматтардын арасында ID-карталарды онлайн алмашуу, жашаган жер боюнча убактылуу каттоону, ошондой эле айдоочулук күбөлүктөрдү алмаштыруу жана санариптештирүү мүмкүнчүлүгүн белгилеп кетүүгө болот. Мындан тышкары, транспорт каражаттарын жана кыймылсыз мүлктү сатуу жана сатып алуу, ОСАГО түзүү жана электрондук форматта ЗАГСтын күбөлүктөрүн кайра алуу боюнча онлайн кызматтар жеткиликтүү.
149 миңден ашык жаран айдоочулук күбөлүктөрүн алыстан алмаштыруудан пайдаланышкан. Мамлекеттик органдардын документ айлануусун санариптик форматка өткөрүү жыл сайын мамлекеттик бюджеттен 1 миллиард сомдон ашык каражатты үнөмдөөгө мүмкүндүк берет.
Президенттин иш башкармалыгынын жетекчиси Каныбек Туманбаев мекеме мамлекеттик органдардын ишин оптимизациялоону улантып, жаңы онлайн кызматтарды киргизип, өлкөнүн санариптик экосистемасын өнүктүрүп жатканын белгиледи.
Кохир Расулзода жүргүзүлүп жаткан иштерге жогорку баа берип, Кыргызстандагы санариптештирүү боюнча тажрыйбаны үйрөнүүгө кызыгуусун билдирди.
Визиттин жыйынтыгы боюнча тараптар өз ара кызыкчылык туудурган тармактарда тажрыйба алмашууга макулдашышты.
