12-февралда парламенттин жыйынында Жогорку Кенештин төрагасы Нурланбек Тургунбек уулу кызматтан кетүү чечимин кабыл алганын билдирди.
Ал бул чечимди өз каалоосу менен кабыл алганын жана эч кандай басымдын натыйжасы эмес экенин белгиледи.
"Мен кызматтан кетишимди конкреттүү адамдар менен байланыштыруу туура эмес деп эсептейм. 2022-жылдын 5-октябрында Жогорку Кенештин VII чакырылышынын спикери болуп шайланганымдан бери, мен парламенттин авторитетин көтөрүү жана кыргыз элинин жана өлкөнүн жалпы кызыкчылыгы үчүн маанилүү мыйзам долбоорлорун кабыл алуу үчүн аракет кылып келдим", - деди ал.
Анын айтымында, Кыргызстандагы саясий туруктуулук, өсүү жана өнүгүүгө көмөктөшүү, Садыр Нургожоевичтин жетекчилиги астында команда менен биргеликте иштөө натыйжасы болуп саналат. Тургунбек уулу депутат катары өз ишин уланта берерин кошумчалады.
Нурланбек Тургунбек уулу өткөн жылы өткөн парламенттик шайлоодо №15 округдан депутат болуп шайланган, ал эми 2025-жылдын 17-декабрында Жогорку Кенештин VIII чакырылышынын спикери кызматын ээлеген.
