Жыйында Кыргызстандын жана Казакстандын элчиликтеринин муктаждыктары үчүн Бишкек жана Нур-Султан шаарларындагы имараттарды жана жер тилкелерин акысыз өткөрүп берүү боюнча макулдашууну ратификациялоону камтыган мыйзам долбоору сунушталды.
Имангазиев белгилегендей, бул макулдашуу 2005-жылы кол коюлган, бирок анда болгону эки объект тууралуу сөз болгон:
- Кыргыз тарап 49 жылга акысыз пайдаланууга 531,66 квадрат метр аянты бар № 17 коттеджди жана «Ала-Арча» жашоо комплексинде жайгашкан 0,17 гектар жер тилкесин берген;
- Казак тарап ошондой эле аналогдук шартта 555,9 квадрат метр аянты бар № В-5 коттеджди жана Нур-Султандагы дипломатиялык шаарчада жайгашкан 0,247 гектар жер тилкесин өткөрүп берген.
Жаңыланган макулдашууга кыргыз тарап тарабынан өткөрүлгөн дагы бир объектти кошуу сунушталууда. Анда Казакстандын элчилигинин имараты иштеп жатат. Мурдагы макулдашууда көрсөтүлгөн дарек азыр Казакстандын Кыргызстандагы элчисинин резиденциясы катары колдонулууда.
Мындан тышкары, жаңы макулдашууга казак тараптан эки объект кошулат:
- Нур-Султанда жаңы Кыргызстандын элчилиги курулчу 0,7412 гектар жер тилкеси;
- Нур-Султанда жалпы аянты 1267,8 квадрат метр болгон имарат жана 0,125 гектар жер тилкеси. Учурда бул жерде убактылуу элчилик жайгашкан, жаңы имараттын курулушу аяктаган соң бул имарат Кыргызстандын элчисинин резиденциясы катары пайдаланылат.
2005-жылдагы макулдашууда аталган Нур-Султандын дипломатиялык шаарчасындагы № В-5 коттеджди бузуу пландалууда, анткени жакынкы чет элдик дипломатиялык миссиялар буга чейин шаардагы башка райондорго көчүп кетишкен.
Эл өкүлдөрү макулдашууну ратификациялоо боюнча мыйзам долбоорун үч окууда бир добуштан колдошту.
