Мектептин ашканасындагы тамактарды текшерүү учурунда шаар башчысы нан бышыруунун абалына жана кызматкерлердин ишине катуу сын айтты. Ал: «Бул нормалдуубы? Бул таш сыяктуу нанга караңыз! Үйгө алып кетиңиз, баланыз татып көрсүн — ал эки кесимин да жебейт. Мындай самсаны берүүгө болобу? Муну мугалимдерге сунуштап көрүңүз — алар да жебейт. Мындай абалда тамак даярдоого кандайча болот?» - деди.
Токторбаев ошондой эле тамак даярдоо процессин, азык-түлүктүн сапатын жана санитардык нормалардын сакталуусун толук текшерүүнү талап кылды. Ал мектепте 1,1 миңден ашык бала билим алып жатканын белгилеп, тамактануу тармагындагы ар кандай бузуулар кабыл алынгыс экенин айтты.
Мындан тышкары, мэр мектептин аймагында жайгашкан коммерциялык объект менен байланыштуу маселени чечүүнүн зарылдыгын белгиледи. Ал: «Мектеп — бул социалдык объект, жана анын аймагында курулуш мыйзамдуу жана макулдашылган болушу керек. Документтерди текшериңиз жана толук пакетти сунуштаңыз», - деди.
Женишбек Токторбаев мурун муниципалитет мектептердин аймактарына көзөмөлдү күчөтүп, жерди басып алуу жана мыйзамсыз курулуштарды алдын алуу үчүн чараларды көргөнүн эске салды.
Текшерүүнүн жыйынтыгында тиешелүү кызматтарга ашкананын абалын, жабдууларды, азык-түлүктөрдү сактоо шарттарын кайрадан баалоо жана коммерциялык объекттин мыйзамдуулугу боюнча отчет даярдоо тапшырылды.
Мэрия көрүлгөн чаралар жөнүндө коомчулукту маалымдап турууну убада кылды.
