Иш-чарага МТФ-2, Нур-Кожо, Ак-Бата, Ак-Жар, Лебединовка, Аламудун, Төмөнкү Ала-Арчы жана 305-МАБдын тургундары чогулушту, алар административдик-территориялык реформа учурунда Свердловск административдик районуна киришти.
Кеңешмеде ар кандай социалдык жана инфраструктуралык маселелер көтөрүлдү, атап айтканда, суу менен камсыздоо, жолдордун абалы, канализация жана коомдук транспорттун жетишсиздиги боюнча кыйынчылыктар айтылды.
Транспорт жана жолдордун абалы боюнча суроолорго жооп берип жатып, Транспорт департаментинин жетекчиси Уланбек Бейшенбаев жаңы 8-метрлик автобустар жолдорду оңдоп-түзөө жана калыбына келтирүү иштери аяктаган соң гана каттамга чыгарын белгиледи.
Мэр ошондой эле жолдорду оңдоо иштеринин суу менен камсыздоо жана канализация маселелери чечилгенге чейин жүргүзүлбөй турганын кошумчалады. Ал Президенттин демилгеси менен жаңы аймактарды өнүктүрүү программасы иштелип чыкканын, ал 2030-жылга чейин иштей турганын айтты. Бул программаны каржылоонун көлөмү болжол менен 9 миллиард сомду түзөт жана быйылкы жылы анын ишке ашырылышы үчүн 2,5–3 миллиард сом бөлүнгөн.
Ошондой эле, жолугушууда жер тилкелери боюнча маселелер талкууланды. Айбек Джунушалиев жолдорду куруу процессинде мэрия мыйзамсыз орнотулган чарба имараттарын жана жаңы фундаменттерди бузууну пландап жатканын, бирок мурда аныкталган мыйзамсыз турак үйлөрдү бузбай турганын баса белгиледи.
Ал ошондой эле келечекте жаңы мыйзамсыз объектилерди куруу мүмкүн эместигин белгиледи.
Жолугушуунун аягында мэр тиешелүү кызматтардын жетекчилерине айтылган маселелерди тез жана сапаттуу чечүү үчүн конкреттүү чараларды көрүүнү, алардын ишке ашырылышы үчүн так мөөнөттөрдү белгилөөнү тапшырды.
