Кыргыз Республикасынын Министрлер кабинетинин төрагасы Адылбек Касымалиевдин жетекчилиги астында өткөн акыркы аппараттык жыйындын жүрүшүндө билим берүү жана туризм тармагында заманбап санариптик чечимдерди ишке ашыруу маселеси талкууланды. Бул тууралуу өкмөттүн басма сөз кызматы билдирди.
Бирдиктүү «Санариптик туристтик платформа» түзүү маселеси талкуунун негизги темаларынын бири болду. Өкмөт башчы туристтик тармактагы системалык кемчиликтерге, мисалы, визалар, логистика жана камсыздандыруу боюнча бөлүнгөн кызматтарга, ошондой эле туристтик процесстерди координациялоочу бирдиктүү борбордун жоктугуна көңүл бурду.
Туристтер ар бир этапта бюрократия жана тил тоскоолдуктары менен бетме-бет келбеши керек.
Адылбек Касымалиев
Ал, туристтердин өлкөгө киришинен чыгып кетишине чейин мамлекеттик кызматтарды, бизнес-сервистерди жана төлөм чечимдерин бир жерде бириктирген платформа керек экенин белгиледи.
Бул долбоордун алкагында Министрлер кабинетинин төрагасы туризм департаментине, ошондой эле санариптик өнүктүрүү жана каржы министрликтерине жана «Түндүк» ААКсына техникалык талаптарды иштеп чыгуу, каржылоо булактарын аныктоо жана бирдиктүү санариптик туристтик платформаны практикалык ишке ашырууга киришүү тапшырмасын берди.
Платформанын ишке кириши туристтердин өлкөдөгү шарттарын жакшыртууга, кызмат көрсөтүүнүн деңгээлин жогорулатууга жана Кыргызстандагы туристтик тармакты өнүктүрүү үчүн кошумча стимул болору күтүлүүдө.
