Жаңы эрежелерге ылайык, омбудсмендин жана анын аппаратынын максималдуу штаттык саны 120 адамга чейин көбөйтүлөт, анын 22си техникалык жана тейлөө персоналында кызмат ордун ээлейт. Бул чечим омбудсмен институтунун ишинин натыйжалуулугун жогорулатууга багытталган.
Ошондой эле, акыйкатчы аппаратынын муктаждыктары үчүн 12 кызматтык жана кезектеги автотранспорт каражаттарын пайдалануу каралган.
Бул токтомду ишке ашыруунун маанилүү аспектиси республикалык бюджетте бекитилген штаттык саны жана каржылык каражаттарды сактоо болуп саналат. Бул, ошондой эле, азаптоолорду жана башка катаал, адамгерчиликке жатпаган же намысты тебелеген мамилелер жана жазалар боюнча Улуттук борбордун ишмердүүлүгү менен байланышкан штаттык бирдиктерди өткөрүп берүү жана каржылоону эске алуу менен жүзөгө ашырылат.
Мамлекеттик мүлктү башкаруу агенттигине омбудсмен аппаратына мурда Улуттук борбор тарабынан колдонулган материалдык-техникалык базаны өткөрүп берүү тапшырылды.
Мындан тышкары, Каржы министрлиги бул токтомдон келип чыккан өзгөртүүлөрдү 2026-жылга республикалык бюджетке өзгөртүүлөрдү киргизүү боюнча мыйзам долбоорун даярдоодо жана 2027-2028-жылдарга пландаштырылган мезгилде бюджетти түзүүдө эске алууга тийиш.
- Улуттук борбор 2025-жылдын 3-октябрына чейин өз ишин токтотту. Сентябрда президент Садыр Жапаров «Кыргыз Республикасындагы Акыйкатчы (Омбудсмен) жөнүндө» конституциялык мыйзамга кол койду, анын натыйжасында бул борбордун функциялары омбудсмен институтуна өткөрүлүп, борбордун жоюлушуна алып келди.
