Илим, жогорку билим берүү жана инновациялар министрлиги КИВО долбоорунун алкагында Академиялык инновациялык фонддун (АИФ) гранттарынын экинчи этапын жарыялады. Бул тууралуу «Кабар» агенттигинде өткөн пресс-конференцияда министрдин орун басары Дурус Козуев билдирди.
Козуев бул долбоордун негизги максаты – илимий изилдөөлөрдүн сапатын жакшыртуу жана билим берүү программаларын эмгек рыногунун талаптарына ылайыкташтыруу экенин белгиледи. Бул демилгени ишке ашыруу үчүн изилдөө жана инновациялар борборун түзүү пландалууда, ошондой эле АИФтан грант алуу үчүн конкурс уюштурулат. Ал ошондой эле долбоор үч негизги багытты камтый турганын кошумчалады.
«Биринчи багыт университеттердин инфраструктурасын модернизациялоо аркылуу билим берүү жана изилдөө программаларынын актуалдуулугун жана сапатын жогорулатууга багытталган. Бул багыттын алкагында КГМА, КГТУ, КНАУ, КНУ жана ОшГУ университеттеринин базасында беш адистештирилген изилдөө жана инновациялар борбору түзүлөт. Бул заманбап лабораторияларды, жаңы билим берүү программаларын түзүүнү, эл аралык кызматташтыкты кеңейтүүнү, санариптик технологияларды киргизүүнү жана өнөр жай менен түз байланыштарды орнотууну билдирет. Экинчи багыт АИФтан финансылык колдоо аркылуу университеттердин изилдөө жана инновациялык потенциалын жогорулатууга байланыштуу. Үчүнчү багыт – жогорку билим берүүдөгү сапат башкаруу системасын күчөтүү, аккредитация критерийлерин кайра карап чыгуу жана университеттердеги ички сапат системаларын жакшыртуу», - деп тактады Дурус Козуев.
Министрдин орун басары, Кыргызстандагы бардык университеттердин окутуучулары жана изилдөөчүлөр арыз бере алаарын, аялдар тарабынан башкарылган долбоорлорго жана алсыз катмардагы жарандарды камтыган демилгелерге артыкчылык берилерин кошумчалады.
АИФ 200 000 АКШ долларына чейин гранттарды сунуштайт, финансирлөө мөөнөтү 36 айга чейин. Арыздарды берүү мөөнөттөрү төмөнкүчө:
1-этап - 2026-жылдын 8-апрелине чейин, 24:00:
2-этап - 2026-жылдын 30-июлуна чейин, 24:00 толук арыздарды берүү үчүн.
Көбүрөөк маалымат жана арыз формаларын бул жерден таба аласыз: https://egov.kg/ru/ministry/104/news/21044
