2025-жылдын башынан бери «Коркпо, билдир» анонимдүү функциясы аркылуу, электрондук күндөлүк «Кундолукта» 25 миңден ашык окуучунун арызы катталды. Бул тууралуу «Элге собол» берүүсүндө Кыргызстандын Билим берүү министрлигинин тарбия жана мектептен тышкаркы билим берүү бөлүмүнүн башчысы Алтынбек Эркимбеков билдирди.
Эркимбековдун айтымында, бул функция балдарга карата зомбулук учурларын тез арада аныктоо жана аларга керектүү коргоону камсыздоо үчүн иштелип чыккан. Азыркы учурда арыздар кол менен иштелип жатат, бирок бул процессти толук автоматташтыруу үчүн донорлор менен сүйлөшүүлөр жүргүзүлүп жатат.
«Зомбулукка дуушар болгон окуучулар «Коркпо, билдир» бөлүмүндө билдирүү калтыра алышат. Маалымат Билим берүү министрлигине жана Ички иштер министрлигине реалдуу убакытта өткөрүлөт. Биз келечекте системага Саламаттык сактоо министрлиги жана Социалдык өнүктүрүү министрлигинин өкүлдөрүн кошууну пландап жатабыз, ар бир структура өз ыйгарым укуктарынын алкагында ыкчам жооп кайтара алсын. Анонимдүү арыздардын саны жаш өспүрүмдөр арасында жашыруун көйгөйлөрдүн бар экенин көрсөтүп турат, алар мурда айтылбай келген. Мен бул колдонмо балдарга карата зомбулукту алдын алууда маанилүү инструмент болот деп ишенем», - деди Алтынбек Эркимбеков.
Мындан тышкары, ал 2025-жылдын ноябрь айында жүргүзүлгөн изилдөөнүн натыйжалары боюнча, балдар арасында эң көп кездешкен зомбулук формалары психологиялык жана физикалык зомбулук, ошондой эле кибербуллинг экенин кошумчалады.
