Конференцияда ал мазмундуу доклад менен чыкты.
Форум Тажикстандын Душанбе шаарындагы Улуттук китепканасында өтүп, Тажикстан, Россия, Кыргызстан, Казакстан жана Өзбекстандан келген алдыңкы илимпоздор, эксперттер, мамлекеттик органдардын өкүлдөрү жана финансылык тармактын адистерин чогултту.
Иш-чаранын алкагында ректор А.Мамасыдыков саламдашуу сөзүн сүйлөп, бүгүнкү күндө финансылык системанын санариптик трансформациясы мамлекеттердин экономикалык туруктуулугун камсыздоонун негизги факторлорунун бири экенин белгиледи.
Анын айтымында, санариптик технологиялар финансылык башкаруунун ачыктыгын, ылдамдыгын жана натыйжалуулугун жогорулатат, ошол эле учурда адамдык капиталга инвестицияларды талап кылат.
Сөзүндө ректор Борбордук Азия өлкөлөрү үчүн финансылык-санариптик сабаттуулукту өнүктүрүүнүн өзгөчө маанилүүлүгүн баса белгилеп, экономикалык өсүү жана бизнес-процесстердин ылдамдыгы бул багытта кадрларды даярдоого түздөн-түз көз каранды экенин айтты.
Форумдун жүрүшүндө накталай эмес төлөмдөрдү кеңейтүү, санариптик чөйрөдө баалуу кагаздар рыногун өнүктүрүү, ислам финансасы, жашыл финансасы, ошондой эле мамлекеттик финансыларды башкарууда санариптик технологияларды колдонуу маселелери кеңири талкууланды.
Атап айтканда, ислам финансасы ишкердикти өнүктүрүүгө жана кичи жана орто бизнести колдоого көмөктөшөрү, ал эми жашыл финансасы экологиялык жактан таза инвестициялык долбоорлорду илгерилетүүгө багытталгандыгы белгиленди. Ошондой эле, баалуу кагаздар рыногун өнүктүрүү регионалдык экономикалар үчүн жаңы мүмкүнчүлүктөрдү ачары баса белгиленди.
Форумдун жыйынтыгы боюнча эл аралык илимий-тажрыйбалык кызматташтыкты бекемдөө максатында Кыргыз-Узбек эл аралык университети Тажикстандын Каржы министрлигинин алдындагы Илимий-изилдөө финансылык институту менен кызматташтык келишимин түздү.
Бул форум Кыргыз-Узбек эл аралык университетинин эл аралык байланыштарын бекемдөөгө жана финансылык жана санариптик экономика тармагында академиялык жана практикалык кызматташтыкты өнүктүрүүгө маанилүү салым кошту.
