Иш-чарага Министрлер кабинетинин орун басары Эдиль Байсалов, Билим берүү министри Догдуркүл Кендирбаева, Илим, жогорку билим берүү жана инновациялар министри Гульзат Исаматова, ошондой эле педагогика тармагындагы жогорку окуу жайларынын жетекчилери катышты.
Жыйындын катышуучулары педагогикалык кадрларды даярдоо жана алардын квалификациясын жогорулатуу, жаңы мамлекеттик жана предметтик стандарттарды киргизүү, ошондой эле методикалык жана педагогикалык колдоо көрсөтүүнү күчөтүү боюнча негизги маселелерди талкуулашты.
Ошондой эле эл аралык эксперттерди жана тренерлерди тартуу, педагогикалык адистиктер боюнча окуп жаткан студенттерге мамлекеттик колдоо көрсөтүү, ошондой эле STEM тармагында англис тилин билген мугалимдерди даярдоо темалары каралды.
Эдиль Байсалов мугалимдин билим берүү системасындагы ролунун маанилүүлүгүн белгилеп, педагогикалык кадрларды даярдоо жана алардын кесиптик өсүшү мамлекеттик саясаттын приоритеттери арасында болушу керек экенин айтты. Ал бардык кызыкдар тараптардын биргелешип иштөөсүнүн зарылдыгына көңүл бурду.
Министр Кендирбаева болсо педагогдорду даярдоо системасын дүйнөлүк билим берүү коомчулугуна интеграциялоонун маанилүүлүгүн белгилеп, педагогикалык университеттер реформалардын флагмандары болуп, өзгөрүүлөрдүн борборунда болушу керектигин айтты.
