Билим берүү министрлигинин маалымат кызматына ылайык, өлкөнүн ар кайсы аймактарынан 100дөн ашык информатика мугалими, ошондой эле министрликтин, Дүйнөлүк банктын, Кыргыз билим берүү академиясынын, билим берүү мекемелеринин жана IT тармагынын өкүлдөрү бул иш-чарага катышты.
Форумдун ачылышында билим берүү министринин орун басары Лира Самыкбаева мугалимдердин санариптик компетенцияларын өнүктүрүү билим берүү системасын ийгиликтүү санариптештирүүнүн эң маанилүү факторлорунун бири экенин белгиледи. Ал ошондой эле информатика предметинин традициялык ыкмалардан санариптик платформаларды жана интерактивдүү материалдарды колдонууга өтүү глобалдык тенденциясын белгилеп, бул мазмунду жаңыртууга жана билим берүүнү практикага багыттоого, ошондой эле окуучулар үчүн жеткиликтүү кылууга мүмкүндүк берерин айтты.
Форумдун алкагында катышуучулар окуу процессин башкаруу үчүн санариптик платформаларды эффективдүү пайдалануунун жолдорун талкуулашты жана мектептерде алардын колдонулушун кеңейтүү боюнча идеялары менен бөлүшүштү.
Билим берүү министрлигинин маалыматына ылайык, «Санариптик көндүмдөрдү өнүктүрүү» долбоору Кыргызстандагы мугалимдердин жана окуучулардын санариптик компетенцияларын жогорулатууга багытталган. Пилоттук программа «Келечектеги билим берүү» долбоорундагы 1200 мектептин 150сүн камтыды. Долбоорду ишке ашыруу учурунда санариптик көндүмдөрдү баалоо инструменттери иштелип чыкты жана мугалимдердин квалификациясын жогорулатуу боюнча семинарлар өткөрүлдү.
Ошондой эле форумдун алкагында биринчи онлайн-мектеп «Тунгучтун» концепциясы сунушталды, билим берүүдө жасалма интеллектти пайдалануунун келечектери жана жаңы улуттук билим берүү платформаларын түзүү мүмкүнчүлүктөрү талкууланды.
