Бишкек шаарынын билим берүү башкармалыгынын начальниги Рахат Мусаева Бишкекте 119 мектеп жана 120 бала бакча бар экенин билдирди.
Бардык билим берүү мекемелеринин 130у борбордук жылытууга туташтырылган, 54ү газ менен, 46сы электрдик котелдер менен, 15и көмүр менен, беши жылуулук насостору менен жылытыла турганы маалым болду.
Депутат №84 мектеп электрдик конвекторлорду колдонуп жылытууну жүргүзөрүн белгиледи. Бул система борбордук регистрлер аркылуу эмес, электрдик радиаторлор аркылуу жылытуу жүргүзүлөрү менен айырмаланат. Бирок мындай схема окуу процессинде белгилүү бир көйгөйлөрдү жаратат.
Анын айтымында, электр энергиясын үнөмдөө максатында мектептин администрациясы конвекторлорду дем алыш күндөрү өчүрөт. Натыйжада, дүйшөмбү күнү, биринчи сменадагы окуучулар, өзгөчө биринчи жана экинчи класстагылар, сабакка келгенде класстарда суук болуп калат.
«Бир жагынан, бул акылга сыярлык [электр энергиясын үнөмдөө], бирок экинчи жагынан — балдар суук класстарда отурууга мажбур», - деди депутат жана быйыл мындай мектептерди газ менен жылытууга өткөрүү пландалганбы деп кызыкты.
Р.Мусаева №83, №84 мектептер жана №41 бала бакча электр конвекторлорун колдонорун жооп берди. Ал ошондой эле «Бишкектеплоэнерго» мекемесине бул мекемелерди газ менен жылытууга же борбордук жылытуу системасына туташтыруу боюнча кат жөнөтүлгөнүн белгиледи.
