Кыргызстандын билим берүү министринин орун басары Лира Самыкбаева 16-январда «Цифрдык платформаларды иштеп чыгуу жана билим берүү системасында жасалма интеллектти колдонуу» аттуу форумга катышты. Иш-чара Ысык-Көл облусунун Түп районунда өтүп, 300дөн ашык педагогдорду чогултту.
«Кыргызстанда билим берүү: цифрландыруу жана жасалма интеллект доорунда» темасындагы презентациясында Лира Самыкбаева билим берүү тармагы үчүн бирдиктүү цифрдык экосистеманы түзүүгө көңүл бурду.
Анын айтымында, мындай экосистема үч негизги реестрди камтыйт:
Окуучулар реестри;Педагогдор реестри;Билим берүү уюмдарынын реестри. Бул реестрлер бардык керектүү маалыматты бир жерге чогултууга жардам берет, мамлекеттик структураларга маалыматка жетүүнү камсыз кылып, билим берүү процессинин ачыктыгын арттырат.
Форум ошондой эле цифрдык билим берүү платформаларын, электрондук күндөлүктөрдү, аналитикалык системаларды жана окуу процессинде жасалма интеллектти колдонуу мүмкүнчүлүктөрүн талкуулоо үчүн аянтча болду.
