Кадамжай жана Баткен райондорундагы бир нече айылдарда мектеп окуу китептеринин жетишсиздиги байкалууда, - депутат

Жогорку Кенештин жыйынында 14-январда депутат Ырысбек Атажанов (округ №2) Кадамжай жана Баткен райондорунда, ошондой эле Айдаркенде, мектеп окуучуларына арналган окуу китептеринин жетишсиздигин белгиледи.

Атажановдун айтымында, көпчүлүк ата-энелер окуу китептерин өздөрү сатып алууга даяр, бирок алар жеткиликтүү эмес.

Депутат жергиликтүү бийликти бул маселени тез арада чечүү үчүн чара көрүүгө чакырды.

Мындан тышкары, ал Жеңиш айылында жаңы мектеп куруу боюнча сунуш киргизди, анткени 1962-жылы курулган «Ынтымак» мектеби окуучулардын санынын көбөйүшүнө жооп бере албай жатат. Учурда балдар 2-3 сменада окууга мажбур.

Атажанов ошондой эле Умай Эне жана Кыргыз Кыштак айылдарынын тургундарын таза ичүүчү суу менен камсыз кылуунун зарылдыгына көңүл бурду.