Табигый ресурстар, экология жана техникалык көзөмөл министринин орун басары Асель Райымкулова Жогорку Кенештин комитетинин жыйынында 2025-жылы экологияны булгагандыгы үчүн 973 миллион 350 миң сом чогултулганын билдирди.
Ал акча чогултуу планы ийгиликтүү ашырылганын, күтүлгөндөн 199,8% ашып өткөнүн белгиледи.
«Чогултулган каражаттар министрликтин атайын эсебине которулуп, материалдык-техникалык базаны жакшыртуу үчүн жумшалды. Бишкек, Чолпон-Ата жана Талас шаарларында административдик имараттарды оңдоо иштерин жүргүзүүгө киришилди. Иссык-Кулда реабилитациялык борбордун курулушу да башталды. Мындан тышкары, 38 кызматтык унаа, 4 моторлуу кайык, фотокапкан, дрондор, видеофиксаторлор, профессионалдык биноклдор, GPS-навигация системалары жана башка бир катар жабдыктар сатып алынды», - деп кошумчалады ал.
