2026-жылдын 4-февралында Кыргыз Республикасынын Табигый ресурстар, экология жана техникалык көзөмөл министрлигинде өткөн жыйындын алкагында катышуучулар Дүйнөлүк банк менен кызматташуу боюнча маанилүү аспектилерди талкуулашты. Иш-чарага Европа жана Борбордук Азиядагы туруктуу өнүктүрүү боюнча банктын регионалдык директору Самех Нагиб Вахба катышты.
Министрликтин маалыматына ылайык, талкуу стратегиялык өз ара аракеттенүү жана Кыргызстан менен Дүйнөлүк банк ортосунда туруктуу өнүктүрүү боюнча өнөктөштүктү кеңейтүү перспективаларына багытталды.
Абанын сапатын жакшыртуу, климаттык туруктуулукту жогорулатуу жана Дүйнөлүк банк тарабынан колдоого алынган «Кыргызстанда абанын сапатын жакшыртуу» программасын ишке ашыруу маселелери көңүл борборунда болду. Ошондой эле Тоо күн тартибиндеги кызматташтыкты күчөтүүнүн жолдору талкууланды.
Министр Медер Машиев Дүйнөлүк банктын климаттык өзгөрүүлөргө адаптация, экологиялык коркунучтарды азайтуу жана заманбап экологиялык технологияларды колдонуу боюнча негизги улуттук инициативаларды ишке ашыруудагы колдоосунун маанилүүлүгүн белгиледи. Ал ошондой эле министрлик климаттык иш-аракеттер боюнча мыйзамды даярдоо боюнча активдүү иш алып барууда экенин, бул өлкөдөгү төмөн көмүртектүү жана туруктуу өсүш үчүн укуктук жана экономикалык шарттарды түзүүгө жардам берээрин айтты.
Жыйындын аягында Самех Нагиб Вахба катышуучуларга жылуу кабыл алганы жана кызматташтыкты улантуу боюнча талкууга конструктивдүү мамиле кылганы үчүн ыраазычылык билдирди.
