Бишкекте геология тармагын санариптештирүүгө арналган жыйын өттү, аны табигый ресурстар, экология жана техникалык көзөмөл министри Медер Машиев жетектеди. Жыйында «Недра» маалыматтык системасын тесттик режимде киргизүүгө даярдык талкууланды.
Ведомствонун маалыматына ылайык, санариптештирүү боюнча демилгелердин алкагында Кыргыз геология кызматында «Недра» геологиялык маалыматтык системасы иштелип жатат. Проект системанын функционалдык мүмкүнчүлүктөрүн камтыйт жана анын практикалык колдонууга даярдыгын баалайт.
Ошондой эле, системаны геология кызматында интеграциялоого жана анын кен пайдалануу тармагында эффективдүү колдонууга негизги көңүл бурулаары белгиленди.
«Учурда «Недра» системасы тестирлөө стадиясында. Аны киргизүү геологиялык маалыматтарды эсепке алууну жакшыртууга, процесстердин ачыктыгын жогорулатууга жана геология тармагында мамлекеттик кызматтардын сапатын арттырууга мүмкүндүк берет», — деп билдиришти ведомстводон.
Системанын иштелип чыгышы ААК «Түндүк» тарабынан жүргүзүлүүдө. Анын маанилүү артыкчылыктарынын бири — физикалык жана юридикалык жактар үчүн онлайн форматта геологиялык кызматтарды алуу жана арыз берүү мүмкүнчүлүгү.
