Бишкек шаардык сотунан алынган маалыматка ылайык, Нусувалиев жана башка айыпталуучулар камактан бошотулду.
Эми аларга үй камагы түрүндөгү чара белгиленди.
Эсиңиздерге сала кетсек, мурда Октябрь соту Нусувалиевди күнөөлүү деп таап, 13 жыл эркинен ажыратуу жана мүлкүн конфискациялоо жазасына өкүм чыгарган. Үч башка айыпталуучу 12 жыл, бирөө 11 жыл алды.
Максат Нусувалиев 2025-жылдын 24-июнунда ошол кездеги УКМКнын башчысы Камчыбек Ташиевдин катышуусундагы жыйында кармалган. Анын жанына мэриянын муниципалдык менчик башкармалыгынын начальниги жана подряддык уюмдун директору кармалган. Тергөө органдары шаардык паркты көрктөндүрүү жана спорт мектебин оңдоо процессинде коррупциялык аракеттердин бар экенин билдиришкен.
Максат Нусувалиев 2023-жылдын майында Токмок шаарынын мэри болуп дайындалган. Ал мурда Бишкекте транспорт жана жол-транспорт инфраструктурасын өнүктүрүү департаментин башкарган.
