Соттук териштирүү Кара-Суу райондук сотунда өтүп жатат, бирок күбөлөрдүн жоктугунан 18-мартка жылдырылды.
Архивден алынган сүрөт. Кара-Сууда Райымбек Матраимовдун окул баласы Мунарбек Сайпидиновго каршы сот башталды
Тергөөнүн маалыматы боюнча, 2024-жылы Сайпидинов Савай айыл өкмөтүнүн бир нече кызматкерлери жана Жер ресурстары, кадастр, геодезия жана картография мамлекеттик агенттигинин өкүлдөрү, ошондой эле башка жеке адамдар менен биргеликте материалдык пайда алуу максатында кылмыштуу аракеттерди жасаган.
Мунарбек Сайпидинов Россияда кармалып, 2025-жылдын 7-августунда Кыргызстанга экстрадицияланганын белгилеп өтүү керек. Ички иштер министрлиги анын кармалышы Кара-Суу районунда мамлекеттик жер участокторун мыйзамсыз өткөрүп берүү менен байланышканын маалымдады. Бул иш боюнча ага КРнын Кылмыш кодексинин 336-беренеси (коррупция) боюнча айып тагылган жана сот аны камакта кармоо чечимин кабыл алган.
Сайпидинов 2016-жылдан 2020-жылга чейин Кара-Суу районундагы Савай айыл өкмөтүнүн жетекчиси болуп иштеген.
