Ведомствонун маалыматына ылайык, «газ-воздуш аралашмасынын жарылуусу менен андан кийин өрт чыгуу» окуясы 26-февралда кечинде, беш кабаттуу турак үйгө жапсарлашкан кафеде болгон.
«Окуя тууралуу билдирүү алынгандан кийин, Акмолинск облусунун өзгөчө кырдаалдар кызматынан күчтөр жана каражаттар беш мүнөттө окуя болгон жерге келишти. Өрт өчүрүүчүлөр күйүп жаткан имараттан сегиз газ баллону чыгарууга жетишип, 10дон ашык адамды куткарып калышты. Алдын ала маалыматтар боюнча, 20дай адам жаракат алып, алардын алтоо каза болду», — деп айтылат расмий билдирүүдө. Кийинчерээк курмандыктардын саны жети адамга жетти.
Түн ортосуна карай өрт толугу менен өчүрүлдү. Азыркы учурда куткаруучулар урандыларды тазалоону улантууда. Трагедиянын себептери жана шарттары аныкталууда.
