Кыргыз Республикасынын Ички иштер министрлигинин Ички разведка кызматынын кызматкерлери тарабынан жүргүзүлгөн ыкчам иш-чаралардын натыйжасында Бишкекте укук коргоо органдарынын кызматкерлеримин деп тааныштырып, мыйзамсыз аракет кылган адамдардын тобунун иши ачылды. Бул тууралуу ИИМден билдиришти.
Шектүүлөр кызматтык текшерүүлөрдү жүргүзүү менен, турак жайларда кылмыштуу аракеттерди аныктоо максатында, жарандардын батирлерине мыйзамсыз кирип, алардан акча талап кылышкан.
Бул окуяларга байланыштуу ИИМдин Тергөөнү жүргүзүү комитети Кыргыз Республикасынын Кылмыш кодексинин 206-беренесине ылайык, тоноо белгилери боюнча кылмыш ишин козгоду.
Тергөө учурунда үч адам кармалды: К.Ж. (1995-жылы туулган), Ж.Э.Ж. (1994-жылы туулган) жана С.А.А. (1995-жылы туулган), алардын бардыгы мурда жеке күзөт агенттиктеринде иштеген.
Алдын ала маалыматтар боюнча, бул адамдар борбордогу 15 дарек боюнча окшош кылмыштарды жасашкан. Учурда алардын аракеттеринен келген зыяндын көлөмү аныкталууда.
