Бул иш-чарага Ички иштер министрлиги, Улуттук коопсуздук мамлекеттик комитети, Жаза аткаруу мамлекеттик кызматы, Финансылык разведка, Улуттук банк, ошондой эле санариптик өнүктүрүү, билим берүү, маданият, маалымат жана жаштар саясаты, илим жана жогорку билим министрликтеринин өкүлдөрү катышты. Ошондой эле байланыш жана жеке маалыматтарды коргоо боюнча тармактык жөнгө салуучулар да болду.
Жыйын учурунда интернет-мошенничиликтин эң актуалдуу схемалары, анын ичинде телефондук жана мессенджердик алдамчылыктар, аккаунттарды бузуу, ошондой эле минималдуу тобокелдик менен жогорку киреше сунуштары каралды. Жаштар арасында наркотиктерди таратууга интернет мейкиндигин пайдалануу маселесине өзгөчө көңүл бурулду.
Мындан тышкары, санариптештирүү шартында кибер коркунучтарга каршы күрөшүү чаралары, мамлекеттик органдар менен жеке сектордун аракеттерин координациялоонун зарылдыгы, ошондой эле калк арасында санариптик сабаттуулукту жогорулатуу маанилүүлүгү талкууланды.
Генералдык прокуратура жарандарды көңүл бурууга чакырат: жеке маалыматтарды, паролдорду жана банк реквизиттерин үчүнчү жактар менен бөлүшпөөгө, шектүү шилтемелерден качууга жана интернеттеги мүмкүн болгон коркунучтар жөнүндө жакындарына маалымдоого. Мошенник аракеттери аныкталганда, дароо укук коргоо органдарына кайрылуу маанилүү.
