Ош облусунун Ноокат районунда «Хизб ут-Тахрир аль-Ислами» диний-экстремисттик уюмун колдогон топтун иши токтотулду. Бул тууралуу Кыргыз Республикасынын Улуттук коопсуздук мамлекеттик комитети маалымдады.
Ведомстводон берилген маалыматка ылайык, 10-февралда Ноокат районунда аталган уюмдун 11 активисти жана колдоочуларынын жашаган жерлеринде тинтүү жүргүзүлгөн.
Тинтүүнүн жүрүшүндө 75 китеп, 14 мобилдик телефон, 18 блокнот, 86 DVD-диск, 4 планшет, 1 ноутбук, 2 SIM-карта, 14 орус паспорту, 1 мөөр, 1 видеокасета жана 1 «Бакай Банк» банк картасы сыяктуу 217 предмет алынган.
Алынган материалдар соттук диний экспертизага өткөрүлөт. Анын жыйынтыгы чыккан соң «Хизб ут-Тахрир аль-Ислами» катышуучуларына тиешелүү мыйзамдарга ылайык зарыл чаралар көрүлөт.
Окуяны иликтөө иштери уланууда.
