Алынган маалыматка ылайык, окуя 6-февралга караган түнү, саат 00:30 чамасында болгон. Бул убакта жаштар тобу бири-бирине таш ыргытып мушташ уюштурганы тууралуу маалымат келип түшкөн.
Окуя болгон жерге шаардык Ички иштер бөлүмүнүн тергөө-оперативдик тобу дароо жөнөп кетип, окуянын видеотасмаларын чогултуп, алып кетишти.
Манас Ички иштер бөлүмүнүн тергөө кызматы Кыргыз Республикасынын Кылмыш-жаза кодексинин 280-беренеси боюнча Бирдиктүү кылмыштар реестрине иш каттап, катышуучулардын аракеттерин «Хулигандык» катары квалификациялады. Кылмыш иши козголду.
Оперативдик иш-чаралардын жүрүшүндө полиция кызматкерлери конфликтке катышкан бардык жаштардын жеке жактарын аныктап, көрсөтмө берүү үчүн алып келишти. Мушташка катышкан катышуучулардын бири учурда медициналык мекемеде дарыланууда.
Бул окуя Жалал-Абад облусунун Ички иштер башкармалыгынын жетекчилигинин көзөмөлүндө, тергөө иштери уланууда.
