Бул маалыматты Ош облустук ички иштер башкармалыгынын пресс-кызматы берди.
Кара-Суу РОВДсынын экстремизмге жана мыйзамсыз миграцияга каршы күрөшүү кызматынын кызматкерлери жүргүзгөн оперативдик иш-чаралардын жүрүшүндө социалдык тармактарды экстремисттик материалдарды таратуу үчүн колдонгон жаш жигит аныкталды.
Соттук-лингвистикалык экспертизанын жыйынтыгында, шектүү өзүнүн жеке баракчасында Кыргызстанда тыюу салынган «ИГИЛ» террористтик уюмуна байланыштуу материалдарды ачык бөлүшкөнү маалым болду.
Жыйналган далилдер жана экспертизанын жыйынтыктарынын негизинде КРнын Кылмыш кодексинин 332-беренеси боюнча «экстремисттик материалдарды даярдоо жана таратуу» боюнча кылмыш иши козголуп, тергөө иштери башталды.
Оперативдүү-издөө иш-чараларынын натыйжасында шектүү — 2002-жылы туулган Х. уулу Р. кармалды. Ал убактылуу кармоо жайына жайгаштырылды.
Учурда бул кылмыш ишине тиешеси бар башка адамдарды аныктоо максатында тергөө иштери улантылууда.
