Ош ИИБинин маалымат кызматы берген маалыматка ылайык, 2026-жылдын 24-январында эртең мененки саат 05:00 чамасында Ак-Бурин райондук бөлүмүнө тез жардам кызматы тарабынан билдирүү келип түшкөн. Анда У.Салиева көчөсүнүн тургуну, 1999-жылы туулган Б.Г. күйөөсү тарабынан сабалгандыктан жаракат алып, медициналык мекемеге жеткирилгендиги айтылган.
Кийин полиция жабыркаган аялдын 1994-жылы туулган күйөөсүн кармап, тергөө бөлүмүнө алып барган. Кармалган учурда ал алкогольдук мас абалда болгон. Учурда зарыл текшерүүлөр жүргүзүлүүдө.
ИИБден билдиришкендей, аялдын бычак менен жаракат алгандыгы тууралуу маалымат чындыкка дал келбейт жана анын денесинде бычактын жаракаттары табылган эмес.
Алдын ала териштирүү аял күйөөсүнөн качууга аракет кылып, кулап кеткенде жаракат алганын аныктады. Учурда ал ооруканада, дарыгерлер анын абалын канааттандырарлык деп баалашууда.
Кошумча маалыматтар тергөө процессинде жаңы фактылар пайда болгондо берилет.
