Бул тууралуу Нарын облусунун Ички иштер башкармалыгынын Жол кыймылынын коопсуздугун камсыздоо башкармалыгынын өкүлдөрү 2025-жылдын 12 айынын жыйынтыктарын чыгаруу боюнча оперативдик жыйында билдиришти.
Жыйында Кыргыз Республикасынын Ички иштер министрлигинин Жол кыймылынын коопсуздугун камсыздоо башкы башкармалыгынын орун басары, милициянын подполковниги Эмиль Жакыпов, Нарын облусунун Ички иштер башкармалыгынын орун басары, милициянын полковниги Рахат Мурзакматов, Нарын облусунун Ички иштер башкармалыгынын Жол кыймылынын коопсуздугун камсыздоо башкармалыгынын начальниги, милициянын подполковниги Нурбек Салымбаев жана анын орун басары, милициянын подполковниги Бакыт Урмамбетов, ошондой эле Жол кыймылынын коопсуздугун камсыздоо башкармалыгынын аймактык бөлүмдөрүнүн жетекчилери жана укук колдонуу практикасына жооптуу кызматкерлер катышты.
Жыйында жыл башынан бери облуста инспекторлор тарабынан жалпы 28 миң 333 жол кыймылынын эрежелерин бузуу фактысы аныкталганы, мамлекеттик бюджетке 29 млн 833 миң 641 сом суммада айыппулдар өндүрүлгөнү маалымдалды.
Аныкталган бузуу фактылары:
- алкогольдук мас абалда транспорт каражатын башкаруу — 801 айдоочу;
- ылдамдыкты ашыруу — 6 940 айдоочу;
- мыйзамсыз тонерлоо — 106 айдоочу;
- тиешелүү документтерсиз транспорт каражатын башкаруу — 1 820 айдоочу;
- автохулигандык — 51 айдоочу;
- жол белгилерине баш ийбөө — 8 172 айдоочу;
- жолду ашып өтүү эрежелерин бузуу, кагылышуучу жолго чыгуу — 689 учур;
- ар кандай жол кыймылынын эрежелерин бузуу боюнча 4 214 транспорт каражаты убактылуу айып туруу жайларына жайгаштырылды.
Жыйында Э. Жакыпов Жол кыймылынын коопсуздугун камсыздоо башкармалыгынын жеке курамына жергиликтүү бийлик органдарынын өкүлдөрү менен жол кырсыктарын алдын алуу максатында координациялык жыйналыштарды өткөрүү жана жол кыймылынын коопсуздугун камсыздоо боюнча ишти натыйжалуу уюштуруу боюнча тапшырмаларды койду.
Мындан тышкары, жеке курамга мыйзамдуулукту катуу сактоо, кызмат өтөө учурунда айдоочуларга сылык мамиле кылуу жана жол кыймылынын эрежелерин грубо бузган жана Жол кырсыктарына шарт түзгөн айдоочуларга өзгөчө көңүл буруу зарылдыгы белгиленди, бул жол кырсыктарын алдын алуу боюнча профилактикалык иштерди күчөтүү максатында.
