Жогорку Кенештин төрагасы Марлен Маматалиев Россия Федерациясына расмий сапар менен келген парламенттик делегацияны башкарып жатат, деп билдирет парламенттин маалымат кызматы.
Аэропортто делегацияны Мамлекеттик Думанын орун басары Анна Кузнецова жана башка жогорку кызмат адамдары тосуп алды.
Делегациянын курамына депутаттар Талант Мамытов, Гульнара Баатырова, Гулю Кожокулова, Гульнара Акимбаева, Жумабек Салымбеков, Айгуль Ахмедова, Жылдыз Эгенбердиева, ошондой эле санариптик өнүктүрүү жана инновациялык технологиялар министринин биринчи орун басары Нурсултан Кубанов жана «Кыргызтест» директору Батма Топоева-Ставинская кирет.
Сапардын биринчи күнүндө делегация Москвадагы В. Ф. Орлов атындагы «Марьина Роща» мектебин зыярат кылып, мигрант балдардын жалпы билим берүү класстарына кирүү үчүн тестирлөө тартиби менен таанышышты.
Сапар учурунда делегаттар тестирлөө процессин түшүнүп, тапшырмалардын татаалдыгын белгилешип, аларды жеңилдетүүнү сунушташты. Делегациянын мүчөлөрү ошондой эле тесттен өтүп, анын татаалдык деңгээлин жана мазмунун баалашты.
«Чет өлкөдөгү мекендештерибиздин балдары үчүн билим алуу — бул приоритеттүү маанидеги маселе. Тестирлөө шарттары балдардын тилдик өзгөчөлүктөрүн эске алып, түшүнүктүү жана адилеттүү болушу керек», - деп белгиледи Марлен Маматалиев.
«Кыргызтест» директору Батма Топоева-Ставинская: «Билим деңгээлин баалоо маанилүү болгону менен, мындай процедуралар билим алууга тоскоол болбошу керек. Биздин максат — ар бир баланын ыңгайлуу чөйрөдө адаптацияланып, билим алууга мүмкүнчүлүк түзүү», - деп кошумчалады.
Андан кийин спикердин жана делегация мүчөлөрүнүн кыргыз диаспорасы жана эмгек мигранттары менен Кыргыз Республикасынын Көргөзмө-сауда борборунда (ВДНХ) жолугушуусу болду. Ачык диалог учурунда мекендештерди кызыктырган маанилүү маселелер талкууланып, жарандарга түшүндүрмөлөр берилди.
«Мамлекет ар дайым жарандарын колдойт, алардын кайда экендигине карабастан. Көтөрүлгөн бардык маселелер эске алынып, тиешелүү органдар менен иштелип чыгат», - деп баса белгиледи Марлен Маматалиев.
Ошондой эле, сапар учурунда жогорку деңгээлдеги жолугушуулар, анын ичинде Россия Федерациясынын Мамлекеттик Думасынын төрагасы Вячеслав Володин менен жана Федерация Кеңешинин төрайымы Валентина Матвиенко менен эки тараптуу сүйлөшүүлөр пландалган. ```
