Кыргызстандын саламаттык сактоо министри Дамир Осмонов менен Бириккен Улуттар Уюмунун (БУУ) Өнүктүрүү программасынын (ПРООН) өлкөдөгү Туруктуу өкүлү Александра Соловьева ортосунда өткөн жолугушууда саламаттык сактоо тармагындагы учурдагы абал талкууланды.
Негизги көңүл медициналык мекемелерди дары-дармектер жана жабдуулар менен камсыздоо, ошондой эле СПИД, туберкулез жана малярия менен күрөшүү үчүн Глобалдык фонддун жаңы гранттык циклына даярдык маселелерине бурулду.
Талкуунун жүрүшүндө тараптар ПРООНдун колдоосу менен медициналык уюмдар үчүн зарыл болгон дары-дармектер жана медициналык буюмдарды сатып алуу жана жеткирүү процессинин улантылып жатканын белгилешти. Учурда медициналык мекемелерди ийгиликтүү камсыздоо үчүн уюштуруу процедуралары жүргүзүлүүдө.
Мындан тышкары, жолугушуунун катышуучулары биргелешкен программалардын алкагында медициналык продукциянын жеткирүү логистикасы жана этаптары боюнча маселелерди талкуулашты.
Жолугушуунун негизги маселеси Кыргызстандын Глобалдык фонддун жаңы гранттык циклына арыз берүүсүн расмий түрдө даярдоо болду. Мамлекеттин кирешелеринин өсүшүн эске алганда, донордук каржылоонун көлөмү акырындык менен кыскарышы күтүлүүдө, бул коомдук саламаттык сактоо программаларынын улуттук каржылоосунун үлүшүн көбөйтүүнүн зарылдыгын баса белгилейт.
Арыздарды берүү үчүн биринчи терезе июнунун башында ачылат. Бардык зарыл документтерди даярдоо үчүн өлкөнүн эксперттеринин катышуусунда жумушчу топ түзүлгөн. ПРООН арызды даярдоо жана гранттык иш-чараларды ишке ашыруу процессинде техникалык жана эксперттик колдоону улантат.
Жолугушуунун аягында тараптар коомдук саламаттык сактоо программаларынын туруктуулугун камсыздоого, анын ичинде туберкулез жана ВИЧ менен күрөшүүгө, ошондой эле дары-дармек камсыздоо системасын чыңдоого багытталган мындан аркы кызматташууга даярдыктарын растады.
Запись Минздрав КР жана ПРООН дары-дармектерди жеткирүү жана Глобалдык фонддун жаңы гранттык мезгилине даярдык маселелерин талкуулашты биринчи жолу K-Newsда пайда болду.
