Жыйын учурунда катышуучулар ТМД өлкөлөрүндө аба кыймылын уюштуруу боюнча улуттук системаларды гармонизациялоо Концепциясын ишке ашыруу үчүн биринчи кезектеги иш-чаралардын планын талкуулашты.
Аба кыймылын башкаруу эрежелерин бирдиктендирүүгө багытталган Концепция 2025-жылдын 5-июнунда ТМДнын өкмөт башчыларынын Кеңеши тарабынан бекитилген. Анын максаты — улуттук системалар арасында өз ара аракеттенүүнү жеңилдетүү жана учуулардын коопсуздугун жогорулатуу.
Жыйында ошондой эле Беларусь жана Казакстан тарабынан сунушталган ТМД мамлекеттериндеги учкучсуз аба кемелеринин иштеши жана аба кыймылын пландоонун бирдиктүү системасы боюнча сунуштар каралып, макулдугу берилди.
Белгиленген процедураларга ылайык, макулдашылган документтин долбоору ТМДга катышкан мамлекеттердин өкмөттөрүнө каралууга жөнөтүлөт.
Жыйынга Беларусь, Казакстан, Кыргызстан, Россия, Тажикстан жана Өзбекстан өлкөлөрүнүн тиешелүү ведомстволорунун өкүлдөрү, ошондой эле Мамлекет аралык авиация комитетинин, Евразия экономикалык комиссиясынын жана ТМДнын Аткаруу комитетинин адистери катышты.
