Ведомствонун маалыматына ылайык, белгини каттоо боюнча арыз 2025-жылдын 7-июнунда берилген. Бул товардык белги сүрөт жана тексттик бөлүктү камтыган аралаш вариант болуп, Эл аралык товарлар жана кызматтар классификациясынын 45 классы боюнча каттоодон ийгиликтүү өттү. Бул электрондук жабдыктардан жана тамак-аш продуктуларынан баштап, ар түрдүү кызматтарга чейин кеңири спектрдеги товарлар жана кызматтар үчүн коргоону камсыз кылат.
Сарыпов ошондой эле Соода-өнөр жай палатасы бул товардык белгинин жалгыз укук ээси болгонун белгиледи. Бул Палата азыркы учурда юридикалык жана физикалык жактар тарабынан ушул логотипти пайдаланууну көзөмөлдөө боюнча эксклюзивдүү укукка ээ экенин билдирет.
Адистин айтымында, белгини каттоо ички өндүрүүчүлөрдү идентификациялоо жана экспорттук продукцияны коргоо үчүн маанилүү. «Эми өлкөдө биз башка мамлекеттерден келген товарлар жөн гана «Made in KG» деп белгиленип, кайра сатылышын алдын ала алабыз. Улуттук каттоо бизге бул процессти Кыргызстан ичинде көзөмөлдөөгө мүмкүнчүлүк берет», — деп түшүндүрдү ал.
Мындан тышкары, Сарыпов учурда бренд улуттук процедуранын алкагында гана корголгонун кошумчалады. «Ак Илбирс» өлкөдөн тышкары юридикалык күчкө ээ болушу жана эл аралык рыноктордогу жасалма товарлардан корголушу үчүн эл аралык (Мадрид) системасы боюнча каттоо талап кылынат.
Ал ошондой эле Соода-өнөр жай палатасында эл аралык арыз берүү боюнча пландар каралып жатканын, бул кыргыз брендине аталган системага катышкан башка өлкөлөрдө коргоо алууга жана республикага экологиялык жактан таза жана сапаттуу продукция өндүрүүчү статусун расмий түрдө бекитүүгө мүмкүндүк берерин билдирди.
