Жолугушуунун алкагында тараптар жаңы учактар менен авиапаркты жаңылоонун келечегин жана жарандык авиация тармагында кызматташтыкты күчөтүү мүмкүнчүлүктөрүн талкуулашты.
Президент Жапаров бул кызматташтык өлкөдөгү жарандык авиациянын өнүгүшүнө олуттуу кадам экенин белгилеп, бул өз кезегинде жүк ташууларды ишенимдүүлүгүн, учуулардын коопсуздугун жогорулатат жана авиакаттамдарды кеңейтет деп айтты.
Ал ошондой эле өлкөнүн авиация тармагы активдүү өнүгүп жатканын, аэропорттордун инфраструктурасын модернизациялоо жана регионалдык маршруттардын санын көбөйтүү иштери жүрүп жатканын, бул эл аралык стандарттарга жооп берерин белгиледи.
«Мурда бизде төрт аэропорт гана иштеп жаткан, бүгүнкү күндө 11 аэропорт иштеп жатат. Жалал-Абад эл аралык аэропортунун курулушу уланууда», - деп кошумчалады президент.
Мындан тышкары, Жапаров Кыргызстан Европалык Союздун авиация коопсуздугу боюнча «кара тизмеден» чыгуу боюнча акыркы этапта экенин жана кийинки аудит ушул айга пландалганын билдирди. Ал компаниялардын өкүлдөрүнө бул процессте жардам көрсөтүүнү сунуштады.
Йохан Пелиссье, өз кезегинде, Кыргызстандагы авиация тармагындагы оң өзгөрүүлөрдү белгилеп, транспорт жана логистика маселелерин камтыган узак мөөнөттүү кызматташууга даяр экенин билдирди.
«Биз Кыргызстан Евросоюздун аудитин аяктоого жакын экенин кубануу менен билдик жана керектүү колдоону көрсөтүүгө даярбыз», - деди ал.
Ошондой эле Морис Прендергаст жаңы учактар эл аралык стандарттарга толук жооп берерин жана компаниянын адистери кыргызстандык кесиптештерине операциялык системаларды жана жаңы аба кемелеринин техникалык аспектилерин үйрөнүүгө жардам берүүгө даяр экенин кошумчалады.
Жолугушуунун аягында тараптар өз ара пайдалуу кызматташууга даярдыктарын билдирди.
