Өзбекстанда жаш окуучуларды колдоо үчүн жаңы демилге башталууда. Мамлекет башчысы окууга активдүү катышкан мектеп окуучуларына акчалай сыйлык берүү жөнүндө жарыялады.
Жаңы эрежелер боюнча, эң көп китеп окуган жана алардын мазмунун терең түшүнгөн окуучулар 10 миллион сум (817 АКШ доллары) өлчөмүндө сыйлык ала алышат.
Бул программа алкагында жаңы окуу жылына чейин 100 мыкты адабий чыгарманы камтыган атайын жыйнак даярдалат. Бул жыйнак өлкөдөгү бардык билим берүү мекемелерине, анын ичинде мектептерге жана техникалык окуу жайларга жеткирилет.
Мындан тышкары, бул демилге жазуучуларды да колдоону көздөйт. Таланттуу авторлорго чыгармачылык тапшырмалар берилет, жыл бою ай сайын 20 миллион сум (1 634 АКШ доллары) өлчөмүндө төлөмдөр берилет. Бул чаралар жаштардын окууга болгон кызыгуусун арттырууга гана эмес, ошондой эле өлкөдөгү заманбап адабий процессин өнүктүрүүгө да багытталган.
Ташкенттен кабарчы Туланбай Курбанов
