Жогорку Кенештин жыйынында спикер Марлен Маматалиев парламенттин ишинде санариптик технологияларды киргизүү пландары тууралуу айтып берди. Анын айтымында, депутаттар көптөгөн материалдар жана мыйзам долбоорлору менен убагында таанышуу маселесине туш болушууда.
«Документтер жума күнү келгенде, депутаттардын аларды дүйшөмбүгө чейин, комитеттердин жыйыны өтө турган убакка чейин окуу мүмкүнчүлүгү жок. Ошондуктан биз санариптештирүүнү киргизүүнү пландап жатабыз. Биз депутаттарга берилүүчү 90 планшет сатып алуу процессин баштадык. Ар жума күнү материалдар электрондук форматта берилет, пленардык жыйындар, комитеттер, депутаттык топтор жана ар кандай маселелер үчүн төрт категориядагы папкалар уюштурулат», - деп белгиледи ал.
Мындан тышкары, спикер министрликтердин жана ведомстволордун өкүлдөрүнүн комитет жыйындарына катышуусун да оптималдаштыруу пландалып жатканын айтты. Эгер министр катыша албаса, онлайн-байланыш мүмкүнчүлүгү каралган.
Ошондой эле, жарандарды онлайн кабыл алуу уюштурулган коомдук кабыл алуу бөлмөсүнүн ишин жакшыртуу пландалууда, бул региондорго чыгуу зарылдыгын жоюуга жардам берет. Парламенттин имаратынын жанында депутаттык топтор үчүн беш кабыл алуу бөлмөсүн ачуу жана жарандарды күтүүгө ыңгайлуу шарттарды камсыздоо үчүн эне жана бала үчүн бөлмөлөрдү түзүү пландалууда.
