Чынгыз Айтматов атындагы Кино үйүндө 20-февралда анимация жана балдарга арналган аудиовизуалдык контентти өнүктүрүүгө багытталган Консультативдик кеңештин түзүлүшү боюнча жыйын өтөт. Бул тууралуу Кыргызстан Республикасынын Маданият министрлиги маалымдады.
Кинематография департаменти бул иш-чаранын демилгечиси болуп саналат. Бул демилгени негизги максаты улуттук анимацияны илгерилетүү, ал балдар жана өспүрүмдөрдүн билим алуусуна жана тарбиялануусуна, ошондой эле маданий идентичносту бекемдөөгө жардам берет. Мындан тышкары, жергиликтүү авторлорду жана анимация студияларын колдоо каралган.
Жаңы кеңештин милдеттери өлкөдөгү анимация жана балдар контентин өндүрүү боюнча стратегиялык жактан мамилелерди иштеп чыгуу, ошондой эле сапаттуу жана атаандаштыкка жөндөмдүү улуттук продуктуну түзүүгө көмөктөшүү болуп саналат.
Кеңеш сунуштарды иштеп чыгууга, долбоорлорду карап чыгууга, сценарийлерди жана пилоттук иштерди колдоого, ошондой эле улуттук баалуулуктарга негизделген чыгармаларды өнүктүрүүгө катышат. Эл аралык тажрыйбаны киргизүү, сапат стандарттарын түзүү жана жаш курак боюнча маркалоо системасын камсыз кылуу, ошондой эле билим берүү жана чыгармачылык уюмдар менен өз ара аракеттенүүнү камсыз кылуу маанилүү милдеттердин бири болуп саналат.
Маданият министрлигинде мындай кеңештин түзүлүшү өлкөдөгү анимация индустриясын системалуу өнүктүрүүгө жана сапаттуу балдар контентинин туруктуу экосистемасын түзүүгө маанилүү кадам болоорун белгилешет.
